Jam’iyyun siyasa da ke cikin ƙungiyar Coalition for Democracy, ciki har da ADC, NDC da ɓangaren PDP, sun amince za su dakatar da yaƙin neman zaɓensu a faɗin ƙasar ranar 30 ga Nuwamba, 2026.
Jam’iyyun sun ɗauki matakin ne domin halartar taron koli na biyu na ƙungiyar, inda za su rattaba hannu kan yarjejeniyar haɗin gwiwa gabanin zaɓen shugaban ƙasa na ranar 16 ga Janairu, 2027.

Wata sanarwa da Salihu Moh. Lukman ya sanya wa hannu a madadin jam’iyyun ranar Juma’a ta ce an sauya ranar gudanar da taron daga 23 zuwa 30 ga Nuwamba, bisa buƙatar wasu jam’iyyun saboda yadda ’yan takararsu da kwamitocin yaƙin neman zaɓe suka shiga harkokin kamfen.
Read also: Zaben Kano: Lauyoyi kusan 200 Sun Gargadi Tinubu, Kotun Koli
Sanarwar ta bayyana cewa dakatar da kamfen na yini guda zai bai wa shugabannin jam’iyyun damar halartar taron baki ɗaya.
Ta ƙara da cewa taron zai mayar da hankali kan kammala yarjejeniyar haɗin gwiwar, tare da tsara matakan da za a ɗauka gabanin zaɓen 2027.
Read also: Yanzu-Yanzu: Tsagin Ganduje ya sake yin nasara akan tsagin Shekarau a Kotun koli

Ƙungiyar Coalition for Democracy dai ta samo asali ne daga taron G100 Opposition Summit da aka gudanar a Abuja ranar 31 ga Agusta, 2026, domin haɗa kan jam’iyyun adawa wajen kare dimokuraɗiyya da tabbatar da gudanar da sahihin zaɓe a Najeriya.