Shugaban ƙasa Bola Ahmed Tinubu ya kammala hutun aiki da ya tafi Turai, inda ya bar birnin Paris na Faransa domin komawa Najeriya.
Mai ba Shugaban Ƙasa shawara kan yaɗa labarai, Bayo Onanuga, ne ya bayyana hakan a wata sanarwa da ya fitar ranar Talata.
A cewar sanarwar, ana sa ran jirgin Tinubu zai sauka a filin jirgin sama na Murtala Muhammed da ke Legas da yammacin Talata.
Sanarwar ta ce Tinubu ya zaɓi fara komawarsa Najeriya ta Legas ne domin girmama marigayi MKO Abiola, wanda aka bayyana a matsayin gwarzon gwagwarmayar dimokuraɗiyyar Najeriya kuma wanda ake ganin ya lashe zaɓen shugaban ƙasa na 12 ga Yuni 1993.
A ranar samun ’yancin kan Najeriya, Tinubu zai halarci bikin ƙaddamar da wani fim da aka shirya domin karrama Abiola a gidan wasan kwaikwayo na Wole Soyinka da ke Iganmu, Legas.
Yayin zamansa a Legas, Shugaban Ƙasar zai kuma gudanar da wasu muhimman tarurruka da ’yan siyasa da abokan hulɗarsa, yayin da ake ci gaba da shirye-shiryen babban zaɓen 2027.
Tinubu ya bar Abuja zuwa Turai a ranar 30 ga Agusta, inda ya shafe mako guda a London kafin ya wuce Paris.
A Paris, Shugaban Ƙasar ya halarci liyafar cin abinci ta sirri tare da Shugaban Faransa Emmanuel Macron, sannan ya gana da wasu ’yan kasuwa, ciki har da Vincent Bolloré na Bolloré Group.
Read also: Wasu Daga Cikin Hujjojin da Gwamnan Kano Abba Kabir ya Gabatarwa Kotun Daukaka Kara
Read also: Bai kamata CBN ya sauya fasalin kuɗi a wannan gabar ba – Tinubu
A ranar Litinin kuma, Tinubu ya gana da shugaban First Holdings, Femi Otedola.
Ana sa ran Shugaba Tinubu zai koma Abuja bayan kammala harkokin siyasarsa a Legas.
