Daga Kabiru Muhammad Getso
Wasu Mutane a karamar hukumar Gwarzo sun halaka wani barawon babura da ya addabi yankin Gwarzo zuwa dayi.
Barawon kafin rasuwarsa yayi yunkurin karbe babur din wani a wata hanya kusa da garin kwantara, inda ya buge mai babur din kuma ya amshe babur din ya barshi a nan kwance.
Sai dai bayan da shi mai babur din ya samu kansa, sai ya kira waya ga wasu a can gaba inda suka yiwa barawon tara-tara, suka tare shi, suka kuma farmasa har sai yace ga garinku nan.
Barawon Magidanci ne da akai hasashen yakai kimanin Shekaru hamsin, an same shi da wata hoda mai bugar da mutane da kuma wasu kudade, tuni aka garzaya da shi Sashin adana gawawwaki dake Babban Asibitin Gwarzo.
Wakilin kadaura24 ya tuntubi Jam’in hudda da Jama’a na rundunan yan sandan jihar Kano Abdullahi Haruna kiyawa wanda yace bai Sami labarin faruwar lamarin ba, Inda yace da zarar ya gama bibiyar lamarin zai yi mana karin bayani.
