Babbar kungiyar tsofaffin Kantomomin riƙon ta shekarar 2024 ta gudanar da taron addu’o’i na musamman domin neman zaman lafiya mai ɗorewa da neman Allah ya baiwa gwamnan jihar Kano Alhaji Abba Kabir Yusuf nasara a zaben 2027.
An gudanar da taron addu’ar ne a ranar Alhamis, 15 ga Oktoba, 2026, a zauren Coronation Hall da ke gidan gwamnatin Kano.
Taron ya samu halartar mambobin ƙungiyar, ciki har da tsoffin kansiloli, sakatarorin ƙananan hukumomi da shugabanninsu daga dukkan ƙananan hukumomi 44 na jihar.
A yayin taron, mahalarta sun sauke Alƙur’ani mai girma da kuma gudanar da addu’o’i na musamman, inda suka roƙi Allah Maɗaukakin Sarki da ya kawo zaman lafiya, haɗin kai da kwanciyar hankali a Jihar Kano da Najeriya baki ɗaya, musamman yayin da ƙasar ke shirin tunkarar babban zaɓe mai zuwa.
Da take jawabi a wajen taron, Hajiya Balkisu Yakubu Indabo ta yi kira ga al’umma da ’yan siyasa da su rungumi zaman lafiya, haƙuri da haɗin kai, domin ganin jam’iyyar APC ta samu nasara a zaɓukan da ke tafe.
Ta jaddada cewa samar da yanayin zaman lafiya ne kaɗai zai ba da damar cimma kyakkyawan sakamako a harkokin siyasa da zaɓe.
ta ce sun shirya taron ne don rokon Allah ya baiwa gwamnan jihar Kano Alhaji Abba Kabir Yusuf da shugaban Kasa Bola Ahmed Tinubu da dukkanin yan jam’iyyar APC Nasara a zaben 2027 dake tafe.
” Mun shirya tsaf domin ganin mun fito da magoya bayanmu domin zabar dukkanin yan takarar jam’iyyar APC daga sama har kasa , daga kasa har sama”. Inji Bilkisu Indabo
Read also: Da duminsa: Tsohon gwamnan Benue Samuel Ortom ya shiga komar EFCC
Read also: Sifeto-Janar ya kawo sabon Kwamishinan Ƴansanda Kano
Bilkisu Indabo wacce take tsohuwar kantoma ce ta karamar hukumar Wudil, ta ce Kantomini guda 31 ne suka biyo gwamnan jihar Kano Abba Kabir Yusuf cikin jam’iyyar APC.
Bayan kammala saukar da addu’o’ an yanka sa Wanda za a yi Sadaka da shi, domin Allah ya amsa rokon da aka yi.
