Babban Daraktan kudi na hukumar raya kogunan Hadeja-Jama’are Musa Iliyasu Kwankwaso ya ce yana goyon bayan a sami sulhu tsakanin tsofaffin gwamnonin jihar Kano Kwankwaso, Ganduje, Shekarau da Kabiru Gaya.
” Tabbas sulhunta wadannan mutane zai taimakawa jihar Kano ta sami cigaba, wanda duk al’ummar jihar za su yi alfahari da shi, don haka sulhuntasu abu ne mai kyau”.
Musa Iliyasu Kwankwaso ya bayyana hakan yayin wata ganawa da yayi da jaridar Kadaura24 ranar laraba.
Ya ce akwai takaici yadda ake mayar da Kano baya ta hanyar soke wani abun alkhairi da daya daga cikinsu ya yiwa jihar Kano komi yadda al’umma suke amfana da aikin.
Zargin cin zarafi: Ƴansanda sun kama hadimin Gwamnan Kano
” So muke tsofaffin gwamnonin su rika hada kansu wajen daukar wasu matakai da zasu inganta rayuwar al’umma, sannan su amince a junansu cewa duk wanda ya sanya hannu akan wani aiki da zai amfanar da al’umma Kar wani ya zo saboda sabanin Siyasa a soke aiki”.
Ya ce dukkanin tsofaffin gwamnoni sun haura shekaru 65 don haka lokaci ya yi da ya kamata su hada hannu waje guda don ciyar da jihar Kano gaba.
