Daga Rahama Umar Kwaru
Mai kwarmaton nan na jihar Zamfara, Aminu Umar (Game-Game) ya sake tuna Zargin wata badakala a gwamnatin jihar Zamfara inda ake karkatar da Naira miliyan dari da saba’in da shida duk wata.
Shugaban Ma’aikatan ya bayyana hakan ne cikin wata sanarwa da ya Sanyawa hannu Kuma aka aikowa Kadaura24.
Aminu Umar wanda shi ne Shugaban Ma’aikatan Ofishin mataimakin gwamnan jihar Zamfara, Mahdi Aliyu Gusau ya ce ana ciro naira miliyan 176,000,000.00 daga asusun kananan hukumomi 14 na jihar da sunan shirin bada tallafi ga al’umma a Jihar Zamfara Wato Z-SIP wanda aka tsara domin rage radadin talauci a jihar.
Shugaban Ma’aikatan ya bayyana cewa, gwamnan jihar Bello Mohammed Matawalle shi ne mai kula da duk wani asusun gwamnati a jihar Kuma shi ne Mai bada Umarnin shiga ko Fitar kudi a asusun jiha, kuma yana ganin alamar duk wata hada-hadar kudin Gwamnatin jihar.
A cewarsa, shirin na Z-SIP ya fara ne a cikin watan Fabrairu, 2020 inda ake sa ran dukkan wadanda za su ci gajiyar shirin za su rika karbar Naira Dubu Goma (N10,000) duk wata kuma sun karbi alawus din na karshe tun watan Nuwamba, 2020. amma duk wata ana cire Naira 176,000,000.00 daga asusun kananan hukumomi .
Aminu Game-Game wanda ya kalubalanci Gwamnatin Jihar Zamfara karkashin Gwamna Bello Mohammed Matawalle da ya bayyana yadda take kashe kudaden, ya ce Naira Miliyan Saba’in da Shida ne kawai ake biyan wadanda za su ci gajiyar tallafin yayin da ake karkatar da sauran Naira Miliyan Dari a kowane wata, don haka ya bukaci a yi masa bayani.
Shugaban Ma’aikatan Ofishin Mataimakin Gwamna ya kuma bayyana cewa, gwamnatin jihar na cikin halin kaka-nika-yi Sakamakon masu zagon kasa da suka sanya son zuciya a gaban kishi fiye da sanya bukatar talakawa a gaba
