Daga Hafsat Yusuf Sulaiman
Shugaba Bola Tinubu ya bayyana damuwarsa kan juyin mulkin da aka yi ranar Laraba a Jamhuriyar Gabon da ke gabar tekun yammacin Afirka ta Tsakiya.
Jami’an soji a Gabon sun ce sun karbe mulki tare da daure shugaban kasar Ali Bongo a gidan kaso, yayin da kasar ta zama kasa ta baya bayan nan a Afirka da aka yi yunkurin juyin mulki, makonni kadan bayan da dakarun soji suka kwace mulki a Nijar.
Ajuri Ngelale, mai ba shugaban kasa shawara na musamman kan harkokin yada labarai, ya bayyana hakan a ranar Laraba yayin da yake zantawa da manema a fadar shugaban kasa a Abuja.
Ya kara da cewa, Tinubu zai tuntubi sauran shugabannin kasashen Afirka kan rikicin kasar Gabon da nufin gano hanyoyin da za a bi wajen samar da ci gaba ga kasar mai arzikin albarkatun kasa.
Auren Zawarawa: Mun Sayo kayan Dakin Ma’aurata 1,800 – Gwamnatin Kano
“Shugaba Bola Tinubu na sa ido sosai tare da nuna matukar damuwa ga dorewar siyasar zamantakewar al’ummar kasar da kuma yadda ake ganin rigimar mulkin kama-karya da ke yaduwa a yankuna daban-daban na nahiyarmu da muke so.
“Shugaban kasa a matsayinsa na mutum wanda ya sadaukar da rayuwarsa wajen ci gaba da kare dimokuradiyya yana da yakinin cewa mulki a hannun al’umma yafi a hannun masu amfani da karfin bindiga,” inji shi.
Yanzu-Yanzu: NNPP ta dakatar da Kwankwaso
Gabon tana da arzikin albarkatun kasa kamar katako, kuma ita ce kasa ta biyar mafi yawan man fetur a Afrika.
Yanzu bangaren mai na kasar ya kai kashi 50 cikin 100 na GDP da kuma kashi 80 cikin 100 na abubuwan da take fitarwa zuwa kasashen waje.
Ngelale ya ce shugaban yana aiki kafada da kafada kuma yana ci gaba da tattaunawa da sauran shugabannin kasashen kungiyar Tarayyar Afirka.
“Wannan na zuwa ne don samun cikakkiyar yarjejeniya kan matakai na gaba game da yadda wutar lantarki za ta kasance a Gabon da kuma yadda nahiyar za ta mayar da martani ga mulkin kama-karya da ke yaduwa a fadin nahiyar,” in ji shi.
Kamfanin dillancin labaran Najeriya (NAN) ya rawaito cewa jami’an soji sun sanar da karbe mulkin dimokuradiyya karkashin Ali Bongo a ranar Laraba bayan zaben da aka yi ranar Talata.
Sun kuma sanar da soke sakamakon zaben na baya-bayan nan da kuma rusa “dukkan hukumomin kasar”.
