Ɗan takarar kujerar Majalisar Wakilai na ƙananan hukumomin Wudil da Garko a ƙarƙashin tutar jam’iyyar ADC, Hon. Barrister Ahmad Sani Bawa, ya bayyana manufofinsa da shirye-shiryensa na inganta rayuwar al’ummar yankin idan aka zaɓe shi.
Barrister Ahmad Sani Bawa ya bayyana hakan ne yayin wani taron muhawara da Ƙungiyar Ci gaban Matasa ta Ƙaramar Hukumar Garko ta shirya, domin bai wa ’yan takarar kujerar Majalisar Wakilai ta Tarayya damar gabatar da manufofinsu a gaban al’umma.
A yayin taron, ɗan takarar ya bayyana cewa babban burinsa shi ne samar da ingantaccen wakilci da zai mayar da hankali kan ci gaban matasa, inganta harkokin ilimi da lafiya, tare da tallafa wa manoma da mata domin bunƙasa tattalin arzikinsu.
Ya jaddada cewa idan al’ummar Wudil da Garko suka ba shi damar wakiltarsu, zai yi ƙoƙarin tabbatar da cewa wakilcinsa ya amfani kowa, ba tare da nuna bambancin jam’iyya ko yanki ba.
Haka kuma, Barrister Bawa ya tabbatar da aniyarsa ta mutunta yarjejeniyar zaman lafiya da aka cimma tsakanin ’yan takarar, yana mai cewa zai gudanar da yaƙin neman zaɓensa cikin lumana, tare da guje wa cin mutunci ko ɓata sunan sauran ’yan takara.
Taron dai ya gudana cikin kwanciyar hankali, inda aka bai wa kowane ɗan takara damar bayyana manufofinsa da shirye-shiryensa ga al’ummar yankin.
Read also: Iftila’i: Gobara ta kone Shaguna, motoci, da ajujuwa a Kano
Read also: Sharuɗɗa 10 da ke cikin yarjejeniyar tsagaita wutar yaƙin Amurka da Iran
Read also: CBN tace Zata hukunta duk bankin da ke ɓoye sabbin kuɗi da aka canja wa fasali
A nasu ɓangaren, wasu daga cikin masu ruwa da tsaki da suka halarci taron sun yaba da yadda Barrister Bawa ya gabatar da magufofinsa yayin muhawarar, suna mai bayyana cewa natsuwa da yadda ya gabatar da manufofinsa na daga cikin abubuwan da suka lura da su a yayin taron.
