Daga Nusaiba Aliyu Salga
Ma’aikatar Shari’a ta Jihar Kano a ranar Alhamis ta gurfanar da wata mai suna Fadima Dahiru mazauniyar Unguwar Farawa da ke karamar Hukumar Kumbotso a gaban kotu a kan zargin kashe kishiyar ta Mai Suna Waseela har lahira.
Da take gurfanar da wacce ake kara a gaban Mai Shari’a Zuwaira Yusuf, Lauya mai shigar da kara Barista Khadija Umar daga Ma’aikatar Shari’a ta Jihar Kano ta yi zargin cewa Fadima Dahiru a ranar 6 ga Mayu, 2019 da misalin karfe 15:30Hrs ta yi amfani da abu mai kaifi tare da raunata Waseela Wanda hakan yayi sanadiyyar mutuwarta har lahira nan take.
“Kin aikata wani laifi wanda yake karkashin hurumin wannan Kotun mai alfarma da Wanda ya haddasa kisa waseela”.
Khadija Umar ya fadawa kotun cewa laifin da ake karar Fatima a Kansa ya sabawa sashi na 221 (A) na pinal code.
Lauyan da ke kare wadda ake tuhuma Barista Bashir Abdullahi Sufi ya roki kotun da ta ba da damar sauraren karar a rana mai zuwa, mai shari’a Zuwaira Yusuf ta karbi rokon kuma, ta dage sauraron karar zuwa 22 ga Yuli, 2021
