Jagoran jam’iyar NNPP a Nigeria, Sanata Rabiu Musa Kwankwaso ya ce zaɓen ƙananan hukumomin da jam’iyarsa ta gudanar a Kano tarihi ne ya maimaita kansa, “Ba a daki kowa ba, ba a zagi kowa ba, babu wani faɗace-faɗace.”
BBC Hausa ta rawaito Kwankwaso ya ce sun san cewa jam’iyun hammaya na iya daukar matakin shari’a shiyasa suma ba su bari an bar su a baya ba.
“Hukumomin Kano sun san halin wadansu musamman ƴan APC, shiyasa hukumar garzaya kotu saboda ta samu kariya, daman an sanya rai za ayi irin wannan, aka bada hukunci mai ƙwarin gaske wanda ya sanya wa duk wanda zai kawowa dimokradiyya cikasa takunkumi,” Cewar Kwankwaso.
Sanata Rabi’u Musa ya ce duk wadanda suke ƙoƙarin rikita jam’iyyar hadin baki ne domin a haifar masu da rudani da rikici cikin jam’iyarsu.
A yau Litinin ne ake sa ran shugabannin ƙananan hukumomin jihar Kano 44, za su shiga ofis domin fara aiki gadan-gadan, bayan Gwamna Abba Kabir Yusuf ya rantsar da su a ranar Lahadi.
Hakikanin abin da ya faru dangane da cire Abdullahi T Gwarzo daga Minista – Adamu Abdullahi
An gudanar da bikin rantsarwar a fadar gwamnatin jihar, a gaban manyan ƙusoshin gwamnatin jihar da wakilin sarkin Kano da sarakunan Gaya da Rano da Karaye
Zaɓen jihar Kano na ƙarshen makon jiya, ya zo da matuƙar taƙaddama, inda babbar jam’iyyar adawa a jihar, wato APC ta samo umarnin kotu da ya rusa shugabancin hukumar zaɓen Kano.
Hukumar zaɓen jihar ta bayyana jam’iyyar NNPP mai mulkin jihar da lashe zaɓen duka shugabannin ƙananan hukumomin jihar 44 da kansiloli 484.
Jami’iyyar APC mai hamayya a jihar ba ta shiga zaɓen ba.
A ranar Talatar ne wata babbar Kotun tarayya a kano ƙarƙashin jagorancin mai shari’a Simon Amobeda ta rushe shugabancin hukumar zaɓe ta jahar Kano bisa dogaro da hujjojin da aka gabatar mata na rashin cancantar shugabannin hukumar bisa kasancewarsu ƴan siyasa masu ɗauke da katin Jam’iyyar NNPP.
Wani ɗan jam’iyyar APC Hon Aminu Tiga da Jam iyyarsa ta APC ne dai suka shigar da ƙara inda suka roƙi kotun da ta rushe shugabannin hukumar zaɓen ta Kano bisa kasancewrsu ƴan jam’iyya mai mulki.
