Shugaban kamfanin mai na NNPCL Malam Mele Kyari ya ce babu wanda ya kara farashin mai a Najeriya.
Shugaban ya musanta iƙirarin da wasu kungiyoyin masu dakon mai suka yi a baya na cewa an ƙara farashi.
Mele ya bayyana hakan ne yayin wani taron masu ruwa da tsaki da ya gudana a yau Talata kan matsalar karancin mai da ake fama da ita a Najeriya.
Cikin matsalolin da aka ambato da ake ganin su suke kawo tarnaƙi ga man sun haɗa da bangare jigilar man da kuma bangare farashin da aka gaza samun daidaito.
Mele ya kalubalanci duka masu ruwa da tsakin da suka halarci taron da su bayyana wanda ya ce musu an kara farashin man, ko kuma su gabatar da hujjar sun saye shi a sabon farashin da suka yi ikirari.
Tun a baya dai shugaban masu gidajen mai masu zaman kansu reshen ihar Kano Bashir Danmallam ya tabbatar wa BBC Gwamnatin Najeriya ta ƙara farashin man fetur a hukumance da kashi 8.8 inda a halin yanzu farashin ya koma naira 185 Legas da kuma 220 a wasu sassa.
A Najeriya dai an shafe kusan shekar a guda ana karancin man fetur da kuma rashin tabbas kan farashinsa.
