Daga Rukayya Abdullahi Maida
Al’ummar garin Tudun kaya da danfarwa dake karamar hukumar karaye sun yabawa tsohon kwamishinan kananan hukumomin na jihar kano Alhaji Murtala Sule Garo bisa samar musu da rijiyoyin burtsate Masu amfani da haske rana a yankin.
Shugaban karamar hukumar ta karaye Alhaji Balarabe Isyaku Karaye ne ya bayyana hakan ne yayin da yake mika rijiyoyin da aka samar ga al’ummar yankin.
Shugaban karamar hukumar yace rijiyoyin burtsaten zasu taimaka wajen magance karacin ruwa a yankunan, sannan yace nan gaba kadan Murtala Sule Garo ya yi alkawarin samar da wasu aiyukan a garin Tudun kaya da garun maje.
Ya kuma bukaci al’ummar garuruwan da su baiwa rijiyoyin burtsatse kulawar da ta dace don su jima suna amfani da su, sanann ya bukaci su cigaba da baiwa gwamnatin Dr. Abdullahi Umar Ganduje hadin kai su kuma fito su zabi jam’iyyar APC a zaben dake tafe.
A jawabinsu daban-daban dagatan garin Tudun kaya Alhaji Buhari Muhammad da Malam Sulaiman Sa’id sun bayyana farin cikinsu tare da godiyarsu ga Dan takarar mataimakin gwamnan jihar kano a jam’iyyar APC Alhaji Murtala Sule Garo, sun kuma bada tabbacin zasu baiwa rijiyoyin burtsatse kulawar da ta dace.
