Daga Maryam Muhammad Ibrahim
Abin takaici ne ganin yadda gwamnatin NNPP a jihar ta dukufa wajen korar ma’aikatan wucin gadi a Hukumar Tara Haraji ta Kano (KIRS).
Wannan mataki na korar ma’aikata a hukumar KIRS ba wai kawai ya jefa su cikin rudani da rashin aikin yi ba ne, har ila yau ya karya zuciyar dubban iyalai da ke dogaro da waɗannan ‘yan uwa don rayuwa.
A lokacin da ake bukatar ƙarin tallafi da tabbatar da zaman lafiya a cikin gida da al’umma, sai gwamnati ta zabi wata hanya da za ta ƙara jefa mutane cikin ƙunci.
Matakai 3 da gwamnatin Kano ta dauka kan kafafen yada labarai a jihar
Gwamnatin da ke nuna halin ko-in-kula da rayuwar jama’arta, musamman a lokacin da suka fi buƙatar taimako, ba ta cancanci neman wa’adi na biyu ba. Shugabanci na gaskiya yana tabbatar da walwalar ma’aikata, ba korarsu ba; yana gina ƙasa da gina rayuka, ba rugujewa ba.
Muna kira ga Gwamnatin Kano da ta soke wannan matakin korar ma’aikata wucin gadi, da ta dawo da su bakin aiki, tare da ƙarfafa bangaren haraji domin kara samun kudaden shiga da ci gaba mai dorewa.
Kano tana bukatar gwamnati mai tausayi, mai kare rayuwa, da mai sauraron koke da damuwar jama’a ba wadda ke korar su daga aiki a lokaci mai wahala ba.
