Daga Aliyu Danbala Gwarzo
Yayin da Kotun Koli ta kawo karshen rikicin kujerar gwamnan Kano da tabbatar da Alhaji Abba Kabir Yusuf a matsayin zababben Gwamnan Jihar, Gwamna ya mikawa abokin hamayyarsa na jam’iyyar APC, Dakta Nasiru Yusuf Gawuna bukatar ya zo su hada hannu don ciyar da Kano gaba.
Gwamnan wanda ke cike da farin ciki ya bayyana hakan ne a lokacin da yake zantawa da manema labarai a harabar kotun koli da ke Abuja, bayan zartar da hukuncin da ya sauya hukuncin da kotun sauraren kararrakin zabe da na daukaka kara suka yi a baya .
A cewar Gwamna Abba, “a matsayina na mai bin tafarkin dimokuradiyya na gaskiya kuma mai son ci gaba, ina kira ga abokin hamayya ta da magoya bayansa da su ba ni hadin kai wajen fafutukar ganin an raya jiharmu ta Kano.
Da dumi-dumi: Tinubu ya Baiwa Jarumin Kannywood Ali Nuhu Mukami
“Mutanen Kano na bukatar shugabanni masu hangen nesa, kishi, kishi, da jajircewa wajen bullo da ayyuka, manufofi da tsare-tsare wadanda suka shafi rayuwarsu kai tsaye ta kowane bangare da kuma lunguna da sako na jihar.” Gwamna Abba, ya bayyana.
Yanzu-yanzu: Jam’iyyar APC a Kano Ta Magantu Bayan Hukuncin Kotun Ƙoli
Alhaji Abba Kabir ya godewa Allah madaukakin sarki da ya samu nasara, inda ya yabawa al’ummar Kano bisa goyon bayan da suka bashi da jajircewa da addu’o’i da sadaukarwa da jajircewa wajen tabbatar da abin da suka zaba da kuma alkalan kotun koli kan daukaka darajar bangaren shari’a.
Ya kuma yabawa shuwagabannin NNPP a kowane mataki musamman jagoran tafiyar Kwankwasiyya na duniya Sen. Rabi’u Musa Kwankwaso bisa jajircewarsa da goyon bayan da ya bayar a lokacin Shari’ar.
Gwamnan ya kuma yabawa shugaban kasa Bola Ahmed Tinubu da mataimakinsa, Kashim Shattima bisa kin tsoma baki a hukuncin da kotun kolin ta yanke, duk da matsananciyar matsin lamba da suka Sha daga bangarorin da hukuncin bai yiwa dadi ba.
