Tsagin Yari a jam’iyyar APC ta Zamfara sun ce zasu daukaka Karar hukuncin Rushe Shugabanin jam’iyyar

Daga Abdulrazak B Kaura

Tsagin tsohon Gwamnan Jihar Zamfara Alhaji Abdulaziz Yari Abubakar Shattiman Zamfara a jam’iyyar APC yace ta kowacce fuska ba zai lamunci hukuncin da Wata Babbar kotun tarayya dake gusau ta yanke ba, Wanda ta kori karar da Suka shigar Su na Kalubalentar rushe shugabanin jam’iyyar da kwamitin rikon uwar jam’iyyar yayi .

Da yake tsokaci Kan hukuncin kotun, Shugaban jam’iyyar APCn tsagin Abdulaziz Yari Wato Hon. Lawan M Liman Gabdan kaura yace zasu daukaka Kara har Zuwa kotun koli domin tabbatar da an yi musu adalci.

Hon. Lawan M Liman yace dama basu yi mamakin hukuncin kotun ba, Saboda tuni a ganawar da yayi da Manema labarai Sanata Ahmad Sani Yariman Bakura ya bayyana yadda Hukuncin zai kasance, Amma yace hakan ba zai sanyaya musu gwiwa ba wajen daukaka karar don tabbatar da an yi musu adalci.

Cikin Wata sanarwa da Sakataren yada labaran tsagin Abdulaziz Yari  Hon. Ibrahim Muhammad (Dan madamin Birnin Magaji) ya Sanyawa Hannu Kuma aka aikowa Kadaura24, yace in har kotun koli zata yanke hukuncin da yasa jam’iyyar APC ta rasa kujerunta a Zaben Shekara ta 2019 , to Yanzu ma Suna da kwarin gwiwar Samun nasara a kotun gaba.

Ya yabawa kokarin jagoransu tsohon Gwamnan Alhaji Abdulaziz Yari Abubakar bisa tsayyayarsa wajen jagoranci da kuma masu Ruwa da tsakin tsagin tun daga matakin Jiha Kananan Hukumomi da Kuma Mazabu a kafatanin Jihar Zamfara Saboda irin Gudunmawar da suke bayarwa a Koda yaushe ,Kuma yace su na da kyakykyawan zaton Allah zai basu nasara a Wannan gwagwarmayar da suke.