Gwamnatin Kano tafi ta tarayya bada fifiko ga bangaren Lafiya – Dr. Tsanyawa

Daga Nafisa Abdullahi Diso

 Gwamnatin jihar Kano ta ware kashi goma sha bakwai na jimillar kasafin kudin ta domin farfado da kuma inganta sashin kiwon lafiya a jihar, sabanin amincewa da kashi goma sha biyar da gwamnatin tarayya ke bayarwa gaba daya.

 Kwamishinan lafiya, Dakta Aminu Ibrahim Tsanyawa, shi ne ya bayyana hakan yayin rufe wani taron kwana biyu da aka shirya don ci gaban tsarin aikin rigakafin yau d kullum na Shekarar 2022 na Hukumar Kula da Lafiya matakin farko.

 Dakta Tsanyawa wanda ya bayyana irin nasarorin da gwamnati ke samu a fannin kiwon lafiya, ya ba da tabbacin cewa gwamnatin jihar za ta ci gaba da ba da fifiko ga bangaren ta hanyar bayar da duk abubuwan da suka dace ga cibiyoyin kiwon lafiya a jihar.

 Cikin Wata sanarwa da Jami’in hulda da Jama’a na Hukumar Maikudi Muhd Marafa ya aikowa Kadaura24 ya yabawa hukumar kula da lafiya a matakin farko na jihar bisa jajircewa wajen shirya taron.

 A nasa jawabin, Babban Sakataren Hukumar, Dakta Tijjani Hussain, wanda Daraktan Gudanarwa da harkokin Kudi na Hukumar, Alhaji Suleiman Tanimu ya wakilta, ya bayyana godiya ga gwamnatin jihar saboda jajircewarta na inganta sashin kula da lafiya a matakin farko.

 Sakataren zartarwa ya yabawa mahalarta taron da Masu bada tallafin don gudummawar da suka bayar wajen gudanar da taron cikin nasara.