Daga Hafsat Lawan Sheka
Shugaban jam’iyyar APC na kasa, Dakta Abdullahi Umar Ganduje, ya wakilci shugaban kasa Bola Ahmed Tinubu a wajen rufe musabakar kur’ani mai girma ta kasa ta 2023.
Gidauniyar dake kula da Musabaqar karatun kur’ani a Najeriya, cibiyar nazarin addinin musulunci ta Jami’ar Usman Danfordiyo dake Sokoto da kuma gwamnatin jihar Yobe ce suka dauki nauyin shirya taron wanda aka gudanar a Yobe.
Zainab Aliyu Muhammad daga jihar Kano ce ta zama zakara a bangaren mata a musabakar, yayin da dan jihar Bauchi Ibrahim Muhammad Nasir ya zama zakara a bangaren maza na musabakar .
Sai dai gidauniyar Ganduje ta bayar da tallafin Naira miliyan 10 ga wadanda suka yi nasara da kuma wadanda suka shirya gasar.
Da dumi-dumi: Gwamnan Kano Abba Kabir ya Fashe da Kuka Yayin Wani Taro a Gidan Gwamnati
Hakan dai na kunshe ne cikin wata sanarwa da babban mai taimakawa shugaban Jam’iyyar APC na kasa kan harkokin hotunan masu motsi da taruka Aminu Dahiru, ya sanyawa hannu kuma ya aikowa kadaura24.
Gwamna Mai Mala Buni na Jihar Yobe, Gwamna Inuwa Yahaya na Jihar Gombe, Mai alfarma Sarkin Musulmi Muhammad Sa’ad Abubakar II, Sarakunan gargajiya, manyan ‘yan siyasa, da sauran manyan baki ne suka halarci taron.
Dr Abdullahi Umar Ganduje ya samu rakiyar tsohon mataimakin sa, Dr Nasiru Yusuf Gawuna, mataimaki na musamman ga shugaban kasa Tinubu kan harkokin siyasa, Ibrahim Masari, Hon. Aminu Sani Jaji memba mai wakiltar mazabar Kauran Namoda/Birnin Magaji ta jihar Zamfara da Alhaji Lawan Garba.
