Gwamnan jihar Kano Alhaji Abba Kabir Yusuf ya yi Allah wadai da kisan gillar da aka yi wa wasu matasan Kano biyu Barhama Suleiman da Jamilu Ahmad a garin Makurdi na jihar Benue.
A wata sanarwa da mai magana da yawun gwamnan, Sunusi Bature Dawakin Tofa ya fitar, an kai harin ne da misalin karfe 11:00 na dare a ranar Litininda wasu ’yan bindiga suka kaddamar.
Gwamnan ya bayyana matukar alhininsa kan wannan mummunan lamari, inda ya bayyana lamarin a matsayin rashin hankali.
Ya yi Allah-wadai da kashe-kashen da aka yi da kakkausar murya tare da ba da tabbacin cewa gwamnatin jihar na bakin kokarinta wajen ganin an hukunta wadanda suka aikata laifin.
Gwamnan ya kuma bayyana cewa shi da kan sa zai jagoranci wata tawaga mai karfi da suka hada da iyalan marigayin, zuwa sallar jana’izar da aka shirya gudanarwa a babban masallacin kasa dake Abuja a yau 24/06/2025.
Yan uwan wata mata sun zargi Asibitin Malam Aminu Kano da sakaci wajen mutuwar yar uwarsu
Da yake jajantawa iyalan wadanda suka rasu, Gwamnan ya jajanta wa fitaccen malamin addinin musulunci Sheikh Ibrahim Khalil, wanda shi ne uban mutanen biyu da aka kashe.
Gwamna Yusuf, ya bayyana rashin a matsayin abin takaici ga iyalai da abin ya shafa, kuma illa ga jihar Kano da ma kasa baki daya.
