Ƴan majalisar wakilai 2 na NNPP a Kano sun fice daga jam’iyyar zuwa APC

Wasu ‘yan majalisar wakilai biyu daga jihar Kano sun sauya sheƙa daga jam’iyyar NNPP zuwa jam’iyyar APC.

Shugaban Majalisar Wakilai, Tajudeen Abbas, ne ya karanta takardun sauya sheƙar a zaman majalisar da aka gudanar a ranar Alhamis.

Wadanda suka sauya shekar su ne Kabiru Alhassan Rurum da Abdullahi Sani Rogo, wakilan mazabun Rano/Bunkure/Kibiya da Karaye/Rogo a jihar Kano.

‘Yan majalisar sun bayyana rikicin cikin gida da jam’iyyar NNPP ke fama da shi a matsayin dalilin sauya shekar su.