Daga Hafsat Lawan Sheka
Gwamnan jihar Kano Alhaji Abba Kabir Yusuf ya bayyana cewa karbar kaddarar da Sarkin Gaya Alhaji Aliyu Abdulkadir Gaya ya yi shi ne dalilin da yasa ya sake dawo da shi kan karagar mulkin Masarautar.
” Hakuri juriya da karbar kaddarar da ka yi lokacin da aka bayyana sauke ka daga kan karagar mulkin Masarautar Gaya shi ne babban dalilin da Allah ya kalla har ya sake dawo da kai”.
Gwamnan Kano ya bayyana hakan ne lokacin da Sarkin Gaya Alhaji Aliyu Abdulkadir Gaya ya kai masa ziyarar Barka da Sallah.
Gwamnan Kano ya yi alwashin kawo karshen matsalar ruwa a masarautar Rano
A wata sanarwa da Babban Daraktan yada labaran gwamnan Kano Sanusi Bature Dawakin Tofa ya aikowa Kadaura24, ya ce gwamnatin ya yaba matuka da yadda Sarkin ya karbi kaddara.
“Abun da ka yi ka tabbatar wa duniya cewa kai mutum ne mai karbar kaddara a yadda ta zo maka, kuma hakan ya kara tabbatar da nagartarka don haka kai shugaba ne abun koyi”.
Ya kuma ba da tabbacin gwamnatinsa za ta cigaba da bujuro da aiyukan raya kasa da cigaban al’umma a Masarautar ta Gaya.
