Daga Rahama Umar Kwaru
Rundunar ‘yan sandan jihar Kano ta haramta duk wasu haye-hayen karama Sallah a bana.
Kwamishinan ‘yan sandan jihar, CP Ibrahim Adamu Bakori, ne ya sanar da dakatarwar a lokacin da yake zantawa da manema labarai a hedikwatar ‘yan sandan Bompai, ranar Juma’a.
Bakori ya jaddada muhimmancin tabbatar da zaman lafiya da kwanciyar hankali yayin bukukuwan sallah.
Ya ce bincike ya tabbatar da cewa akwai yiwuwar samun tashe-tashen hankula idan har aka gudanar da hawan sallah.
“Mun sami sahihin rahotannin sirri dake nuna cewa bata-gari sun shirya yin amfani da hawan sallah wajen kawo tarnaki, rundunar ‘yan sandan bayan ta tuntubi gwamnatin jihar Kano da sauran masu ruwa da tsaki, ta yanke shawarar haramta duk wani Hawan Sallah a fadin jihar,” in ji CP Bakori.
Dalilan mu na Dakatar da Hawan Sallah a Kano – Sarki Aminu Ado Bayero
Kwamishinan ya tabbatar wa mazauna jihar Kano cewa an samar da isassun matakan tsaro don tabbatar da cewa al’umma sun gudanar da Sallar Idi lami lafiya .
Sabon kwamishinan ‘yan sandan ya bukaci al’umma da su bi ka’idojin tsaro da suka hada da nisantar daukar abubuwan da ba su da amfani da za su haifar da zargi da kuma gujewa hawan dawaki da tseren motoci da tukin ganganci.
