Daga Abdullahi Shu’aibu Hayewa
Gwamnatin Kano ta sanya dokar taƙaita zirga-zirga ta tsawon sa’o’i 18 daga ƙarfe 12:00 na daren yau Juma’a zuwa 6:00 na yammacin gobe Asabar.
Gwamnatin ta ayyana dokar ce bayan tuntuɓar hukumomin tsaro kamar yadda wata sanarwa da Kwamishinan Labarai da Harkokin Cikin Gida, Baba Halilu Dantiye ya fitar a yammacin wannan Juma’ar.
Baba Dantiye ya buƙaci jama’a da su mutunta wannan doka ta taƙaita zirga-zirga domin bayar da haɗin kai wajen tabbatar da an gudanar da zaɓen ƙananan hukumomin jihar cikin aminci.
Ba fashi za mu gudanar da zaben kananan hukumomin Kano gobe Asabar. KANSIEC
Kwamishinan ya nanata ƙudirin gwamnatin na tabbatar da an gudanar da tsarkakken zaɓe na gaskiya da adalci.
Sanarwar da Kwamishinan ya fitar ta ƙara da cewa, dokar ta shafi dukkan ƙananan hukumomin jihar 44 da gundumomin zaɓe 484 da ke faɗin jihar.
Sanya dokar dai na zuwa ne ƙasa da sa’o’i 24 gabanin zaɓen ƙananan hukumomin Kano da zai gudana a gobe Asabar, 26 ga watan Oktoba.
