Dakarun Sojin Najeriya sun kai samame wasu maboyar ’yan bindiga a jihohin Katsina da Zamfara, inda suka yi nasarar kashe 11 daga cikinsu.
Wannan na cikin wata sanarwa da rundunar ta wallafa a shafinta na X (Twitter), a ranar Litinin.
Rundunar ta ce a wani samame da suka kai a Zamfara a ranar 29 ga watan Maris, sun yi nasarar tarwatsa maboyar kasurgumin dan bindiga, Hassan Yantagwaye, a Karamar Hukumar Tsafe.
Gwamnatin Kano Ta Kori Wasu Ma’aikatan Lafiya 3, TA Kuma Dakatar Da Wasu
Sanarwar ta kara da cewa, Yantagwaye da yaransa ne ke da alhakin sace mutane da ayyukan ta’addanci a wasu yankunan Arewa maso Yammacin Najeriya.
“A yayin farmakin, sojoji sun fatattaki ’yan bindigar a wani artabu da suka yi, inda suka kashe uku daga cikinsu tare da kwato muggan makamai da alburusai a maboyarsu.
Sarkin Kano ya Jagoranci Rabawa Marayu Kayan Sallah da Gidauniyar Hasken Al’umma ta Samar
“A Jihar Katsina kuwa, a ranar 30 ga watan Maris, sojoji sun yi artabu da ‘yan bindiga a yankunan Shawu Kuka, Shinda, Tafki, Gidan Surajo, da Citakushi a Kabai I da Kabai II duk a Karamar Hukumar Faskari.
“Sojojin sun kashe ’yan bindiga takwas tare da kwato bindigogi guda uku kirar gida, kakin soji da kuma kayan abinci,” in ji sanarwar.
Rundunar ta ce tana ci gaba da yaki da ’yan ta’adda domin tabbatar da tsaro da zaman lafiya a jihohin da ma Najeriya baki daya.
