Daga Isa Ahmad Getso
Wata Babbar Kotun Tarayya dake zamanta a Maitama, Abuja ta baiwa, DSS wa’adin kwanaki bakwai ta gurfanar da dakataccen gwamnan babban bankin Najeriya Godwin Emefiele da aka dakatar zuwa kotu ko kuma ta sake shi .
Idan dai za a iya tunawa kadaura24 ta rawaito gwamnan babban bankin Najeriyar ya maka ofishin babban mai shari’a na Nigeria da hukumar tsaro ta farin kaya DSS kara bisa zargin kama shi da tsare shi, yana mai zargin hukumomin na aikata hakan, wani kuduri na siyasa a kansa.
Emefiele ya nemi a sake shi daga hukumar ta DSS ta hanyar neman hakkinsa da babban lauyan sa, J.B. Daudu SAN ya shigar a madadin sa.
Ya bukaci kotun da ta bayyana cewa kamun da aka yi wa gwamnan CBN da aka dakatar ba tare da tuhumar sa ba ko kuma wata kotu ta kama shi ya zama tauye masa hakkinsa.
Shari’ar zaɓen gwamnan Kano: INEC ta gabatar da na’urar BVAS 21 ga kotu
Hakazalika ya yi rokon cewa mai neman na da ‘yancin walwala da kuma ba da umarnin sakin Emefiele ba tare da wani sharadi ba ko kuma a ba da belinsa.
Lauyan Emefiele ya kuma nemi umarnin hana wadanda ake kara ci gaba da tsare wanda ake tuhuma da laifin aikata wani laifi, inda ya kara da cewa a biya wanda ake tuhumar naira biliyan 5.
Idan za a iya tunawa, a ranar 9 ga watan Yuni ne shugaban kasa Bola Tinubu ya dakatar da gwamnan babban bankin na CBN daga ofis, inda ya share fagen gudanar da bincike a kan wa’adinsa a babbar cibiyar hada-hadar kudi.
Daga nan ne shugaban kasa ya umurci mataimakin gwamnan CBN akan ayyuka, Folashodun Adebisi Shonubi da ya zauna a matsayin mukaddashinsa.
A cikin takardar karar da lauyan ta, I. Awo, DSS ta musanta zargin da ake yi wa Shugabannin siyasa, inda ta ce “an kama wanda ake tuhuma da laifin aikata wasu laifuka da suka hada da cin amana, tada zaune tsaye, da karkatar da jama’a dukiyar al’umma, zagon kasa ga tattalin arzikin kasa da kuma zagon kasa ga tsaron Najeriya.”
Awo ya ci gaba da cewa bayan da aka kama wanda ake nema, an samu umarnin tsare shi daga wata kotun Majistare domin baiwa hukumar damar ci gaba da tsare shi na tsawon kwanaki 14 bayan da ta gano cewa za a dauki lokaci kadan kafin a kammala bincike a ofishin sa.
Ya bukaci kotun da kada ta amince da bukatar Emefiele, inda ya yi zargin cewa yana shirin ficewa daga kasar.
