Daga Khalifa Abdullahi Maikano
Hukumar kula da yanayi ta Najeriya ta ce ana sa ran kura da hazo daga Nijar da Chadi za su shigo cikin kasar nan cikin sa’o’i 24 masu zuwa a wasu sassan jihohin arewacin kasar da ke nuna yiwuwar shigowar yanayin sanyi.
Sanarwar da hukumar ta fitar na nuni da cewa hazon kura za ta yi kamari ne a jihohin Maiduguri, Yobe, Katsina, Kano, Kaduna, Gombe, Bauchi da Jigawa, yayin da jihohin da ke shiyyar Arewa ta tsakiya za su fuskanci yanayi mai zafi da rana da kuma hazo.
Ana sa ran cewa wannan yanayin zai ci gaba har zuwa kwanaki 3 masu zuwa tare da karuwar Yanayin.
Bisa al’ada a yanayin sanyi ana fuskantar hazo da kura da zafin rana wanda wani lokacin yakan haifar da ciwon sankarau, hukumar NiMet ta shawarci masu ababen hawa da suyi tuki cikin taka tsantsan da kuma duba lafiyar ababen hawansu a duk lokacinda zasuyi amfani dasu.
Har ila yau hukumar ta shawarci ma’aikatan kamfanin jirgin sama dasu samu rahotannin yanayi daga NiMet kafin gudanarda aiyukansu duba da yanayin sanyi da ake kokarin shiga
